석보상절

釋셕〮譜봉〯詳쌰ᇰ節져ᇙ〮 第똉〮六륙〮

世솅〮尊존 이〮 象쌰ᇰ〯頭뚜ᇢ山산애〮 가〮샤〮 龍료ᇰ과〮 鬼귕〯神씬과〮 위〯ᄒᆞ〮야〮 說ᄉᆑᇙ〮法법〮ᄒᆞ〮더〮시다〮 【龍료ᇰ鬼귕〯 위〯ᄒᆞ〮야〮 說ᄉᆑᇙ〮法법〮ᄒᆞ〮샤미〮 부텻 나〮히〮 셜흔〮둘〯히러〮시니〮 穆목〮王ᅌᅪᇰ 여슷〮찻 ᄒᆡ〮 乙ᅙᅵᇙ〮酉융〯 ㅣ라〮】

부톄〯 目목〮連련 이〮ᄃᆞ려〮 니ᄅᆞ샤〮ᄃᆡ〮 네〯 迦강毗삥羅랑國귁〮 에〮 가〮아〮 아바〮니ᇝ〯긔〮와〮 아ᄌᆞ〮마니ᇝ〯긔〮와〮 【아ᄌᆞ〮마니〯ᄆᆞᆫ〮 大땡〮愛ᅙᆡᆼ〮道또ᇢ〯 ᄅᆞᆯ〮 니르시〮니〮 大땡〮愛ᅙᆡᆼ〮道또ᇢ〯ㅣ 摩망耶양夫붕人ᅀᅵᆫ ㅅ 兄ᄒᆑᇰ니〯미〮시니〮 야ᇰᄌᆡ〮 摩망耶양夫붕人ᅀᅵᆫ만〮 몯〯ᄒᆞ〮실ᄊᆡ〮 버근〮 夫붕人ᅀᅵᆫ이〮 ᄃᆞ외시〮니라〮】 아자바〮님〯내〮ᄭᅴ〮 다〯 安ᅙᅡᆫ否부ᇢ〯ᄒᆞ〮ᅀᆞᆸ고〮 ᄯᅩ〮 耶양輸슝陁땅羅랑 ᄅᆞᆯ〮 달애〮야〮 恩ᅙᆞᆫ愛ᅙᆡᆼ〮ᄅᆞᆯ〮 그쳐〮 羅랑睺ᅘᅮᇢ〮羅랑 ᄅᆞᆯ〮 노하〮 보내〮야〮 샤ᇰ〯재〮 ᄃᆞ외에〮 ᄒᆞ라〮 羅랑睺ᅘᅮᇢ〮羅랑ㅣ 得득〮道또ᇢ〯ᄒᆞ〮야〮 도라〮가〮ᅀᅡ〮 어〮미ᄅᆞᆯ〮 濟졩〮度똥〮ᄒᆞ〮야〮 涅녀ᇙ〮槃빤 得득〮호〮ᄆᆞᆯ〮 나 ᄀᆞᆮ〮게〮 ᄒᆞ리〮라〮
目목〮連련이〮 그 말〯 듣ᄌᆞᆸ〯고〮 즉〮자히〮 入ᅀᅵᆸ〮定뗘ᇰ ᄒᆞ〮야〮 펴〮엣〮던 ᄇᆞᆯᄒᆞᆯ〮 구필〮 ᄊᆞᅀᅵ〮예〮 【ᄲᆞᆯ론〮 주〮를〮 니르니〮라〮】 迦강毗삥羅랑國귁〮에〮 가〮아〮 淨쪄ᇰ〮飯뻔〮王ᅌᅪᇰᄭᅴ〮 安ᅙᅡᆫ否부ᇢ〯 ᄉᆞᆲ〯더니〮 耶양輸슝ㅣ 부텻 使ᄉᆞᆼ〮者쟝〯 왯〮다〮 드르시〮고〮 【使ᄉᆞᆼ〮者쟝〯ᄂᆞᆫ〮 브〮리〮신 사〯ᄅᆞ〮미라〮】 靑쳐ᇰ衣ᅙᅴᆼ ᄅᆞᆯ〮 브〮려〮 긔별〮 아라〮 오라〮 ᄒᆞ〮시니〮 羅랑睺ᅘᅮᇢ〮羅랑 ᄃᆞ려〮다가〮 沙상彌밍 사모〮려〮 ᄒᆞ〮ᄂᆞ다〮 ᄒᆞᆯᄊᆡ〮 【沙상彌밍ᄂᆞᆫ〮 새〮 出츄ᇙ〮家강 ᄒᆞᆫ 사〯ᄅᆞ〮미니〮 世솅〮間간앳 ᄠᅳ〮들〮 그치〮고〮 慈ᄍᆞᆼ悲빙ㅅ ᄒᆡᇰ〯뎌〮글〮 ᄒᆞ다〮 ᄒᆞ〮논 ᄠᅳ〮디니〮 처〮ᅀᅥᆷ 佛뿌ᇙ〮法법〮에〮 드〮러〮 世솅〮俗쑉〮앳〮 ᄠᅳ〮디〮 한〯 젼ᄎᆞ〮로〮 모로〮매〮 모〯딘〮 ᄠᅳ〮들〮 그치〮고〮 慈ᄍᆞᆼ悲빙ㅅ ᄒᆡᇰ〯뎌〮글〮 ᄒᆞ〮야ᅀᅡ〮 ᄒᆞ릴〮ᄊᆡ〮 沙상彌밍라 ᄒᆞ니〮라〮】
耶양輸슝ㅣ 그 긔별〮 드르시〮고〮 羅랑睺ᅘᅮᇢ〮羅랑 더브〮러〮 노ᄑᆞᆫ〮 樓루ᇢ 우희〮 오ᄅᆞ시〮고〮 【樓루ᇢ는〮 다라기〮라〮】 門몬ᄃᆞᆯ〮ᄒᆞᆯ〮 다〯 구디〮 ᄌᆞᆷ겨〮 뒷〮더〮시니〮 目목〮連련이〮 耶양輸슝ㅅ 宮구ᇰ의〮 가〮 보니〮 門몬ᄋᆞᆯ〮 다〯 ᄌᆞᄆᆞ고〮 유〯무 드류ᇙ〮 사〯ᄅᆞᆷ도〮 업〯거늘〮 즉〮자히〮 神씬通토ᇰ力륵〮 으〮로〮 樓루ᇢ 우희〮 ᄂᆞ라〮 올아〮 耶양輸슝ㅅ 알ᄑᆡ〮 가〮 셔니〮 耶양輸슝ㅣ 보〮시고〮 ᄒᆞ녀ᄀᆞ〮론〮 분별〮ᄒᆞ〮시고〮 ᄒᆞ녀ᄀᆞ〮론〮 깃거〮 구쳐〮 니러〮 절〮ᄒᆞ〮시고〮 안ᄌᆞ쇼〮셔〮 ᄒᆞ〮시고〮 世솅〮尊존ㅅ 安ᅙᅡᆫ否부ᇢ〯 묻〯ᄌᆞᆸ고〮 니ᄅᆞ샤〮ᄃᆡ〮 므스〮므라〮 오〮시니〮ᅌᅵᆺ고〮
目목〮連련이〮 ᄉᆞᆯᄫᅩ〮ᄃᆡ〮 太탱〮子ᄌᆞᆼ〯 羅랑睺ᅘᅮᇢ〮羅랑ㅣ 나〮히〮 ᄒᆞ마〮 아호〮빌ᄊᆡ〮 出츄ᇙ〮家강ᄒᆡ〯여〮 聖셔ᇰ〮人ᅀᅵᆫㅅ 道또ᇢ〯理링〯 ᄇᆡ화〮ᅀᅡ〮 ᄒᆞ리〮니〮 어버ᅀᅵ〮 子ᄌᆞᆼ〯息식〮 ᄉᆞ라ᇰ호〮ᄆᆞᆫ〮 아니〮 한 ᄉᆞᅀᅵ〮어〮니와〮 ᄒᆞᄅᆞᆺ아ᄎᆞ〮ᄆᆡ〮 命며ᇰ〮終쥬ᇰᄒᆞ〮야〮 【命며ᇰ〮終쥬ᇰ은〮 목숨〯 ᄆᆞᄎᆞᆯ〮 씨〮라〮】 모〯딘〮 길 헤〮 ᄠᅥ러〮디면〮 恩ᅙᆞᆫ愛ᅙᆡᆼ〮ᄅᆞᆯ〮 머리〮 여희〮여〮 어〮즐코〮 아〮ᄃᆞᆨ〮ᄒᆞ〮야〮 어〮미도〮 아ᄃᆞ〮ᄅᆞᆯ〮 모ᄅᆞ〮며〮 아ᄃᆞᆯ〮도〮 어〮미ᄅᆞᆯ〮 모ᄅᆞ〮리니〮 羅랑睺ᅘᅮᇢ〮羅랑ㅣ 道또ᇢ〯理링〯ᄅᆞᆯ〮 得득〮ᄒᆞ〮야ᅀᅡ〮 도라〮와〮 어〮마니〯ᄆᆞᆯ〮 濟졩〮度똥〮ᄒᆞ〮야〮 네〯 가짓〮 受쓔ᇢ〯苦콩〯ᄅᆞᆯ〮 여희〮여〮 涅녀ᇙ〮槃빤 得득〮호〮ᄆᆞᆯ〮 부텨 ᄀᆞ〮ᄐᆞ〮시긔〮 ᄒᆞ리〮ᅌᅵ다〮 【네〯 가짓〮 受쓔ᇢ〯苦콩〯ᄂᆞᆫ〮 生ᄉᆡᇰ과〮 老로ᇢ〯와〮 病뼈ᇰ〮과〮 死ᄉᆞᆼ〯왜〮라〮】
耶양輸슝ㅣ 니ᄅᆞ샤〮ᄃᆡ〮 如ᅀᅧᆼ來ᄅᆡᆼ 太탱〮子ᄌᆞᆼ〯ㅅ 時씽節져ᇙ에〮 나〯ᄅᆞᆯ〮 겨〯집 사〯ᄆᆞ〮시니〮 내〮 太탱〮子ᄌᆞᆼ〯ᄅᆞᆯ〮 셤기〮ᅀᆞᄫᅩ〮ᄃᆡ〮 하ᄂᆞᆯ〮 셤기〮ᅀᆞᆸ〯ᄃᆞᆺ〮 ᄒᆞ〮야〮 ᄒᆞᆫ 번도〮 디만〮ᄒᆞᆫ 일〯 업〯수니〮 妻촁眷권〮 ᄃᆞ외얀〮 디〮 三삼年년이〮 몯〯 차〮 이셔〮 世솅〮間간 ᄇᆞ리〮시고〮 城쎠ᇰ 나마〮 逃또ᇢ亡마ᇰᄒᆞ〮샤〮 車챵匿닉〮이〮 돌아〮보내〮샤〮 盟며ᇰ誓쏑〮ᄒᆞ〮샤ᄃᆡ〮 道또ᇢ〯理링〯 일워〮ᅀᅡ〮 도라〮오〯리라〮 ᄒᆞ〮시고〮 鹿록〮皮삥 옷〮 니브샤〮 미친〮 사〯ᄅᆞᆷ ᄀᆞ〮티 묏고〯래〮 수〮머〮 겨〯샤〮 여슷〮 ᄒᆡ〮ᄅᆞᆯ〮 苦콩〯行ᅘᆡᇰ〮 ᄒᆞ〮샤〮 부텨 ᄃᆞ외야〮 나라〮해〮 도라〮오〮샤도〮 ᄌᆞ올아ᄫᅵ〮 아니〮ᄒᆞ〮샤〮 아〯랫〮 恩ᅙᆞᆫ惠ᅘᆒᆼ〮ᄅᆞᆯ〮 니저〮ᄇᆞ리〮샤〮 길〮 녀ᇙ 사〯ᄅᆞᆷ과〮 ᄀᆞ〮티 너기〮시니〮 나〮ᄂᆞᆫ〮 어버ᅀᅵ〮 여희〮오〮 ᄂᆞᄆᆡ〮그ᅌᅦ 브터〮 사로〮ᄃᆡ〮 우리〮 어ᅀᅵ〮아ᄃᆞ〮리〮 외〮ᄅᆞᆸ고〮 입〯게〮 ᄃᆞ외야〮 人ᅀᅵᆫ生ᄉᆡᇰ 즐〮거〮ᄫᅳᆫ ᄠᅳ〮디〮 업〯고〮 주구〮믈〮 기드〮리〮노니〮 목수〯미〮 므〮거〮ᄫᅳᆫ 거실〮ᄊᆡ〮 손〮ᅀᅩ 죽디〮 몯〯ᄒᆞ〮야〮 셟〯고〮 애〯왇븐 ᄠᅳ〮들〮 머거〮 갓가ᄉᆞ〮로〮 사〯니〮노니〮 비록〮 사〯ᄅᆞᄆᆡ〮 무〮레〮 사〯니〮고도〮 쥬ᇰᄉᆡᇰ마〮도〮 몯〯호〮ᅌᅵ다〮 셜〯ᄫᅳᆫ 人ᅀᅵᆫ生ᄉᆡᇰ이〮 어딋〮던 이〮 ᄀᆞ〮ᄐᆞ니〮 이시리〮ᅌᅵᆺ고〮 이〮제 ᄯᅩ〮 내 아ᄃᆞ〮ᄅᆞᆯ〮 ᄃᆞ려〮가〯려〮 ᄒᆞ〮시〮ᄂᆞ니〮 眷권〮屬쑉〮 ᄃᆞ외ᅀᆞᄫᅡ〮셔〮 셜〯ᄫᅳᆫ 일〯도〮 이〮러〮ᄒᆞᆯ쎠〮 【眷권〮屬쑉〮ᄋᆞᆫ〮 가시〮며〮 子ᄌᆞᆼ〯息씩〮이〮며〮 죠ᇰ〮이〮며〮 집아ᇇ〮 사〯ᄅᆞᄆᆞᆯ〮 다〯 眷권〮屬쑉〮이〮라〮 ᄒᆞ〮ᄂᆞ〮니라〮】 太탱〮子ᄌᆞᆼ〯ㅣ 道또ᇢ〯理링〯 일우〮샤〮 ᄌᆞ〮걔 慈ᄍᆞᆼ悲빙 호〮라〮 ᄒᆞ〮시〮ᄂᆞ니〮 慈ᄍᆞᆼ悲빙ᄂᆞᆫ〮 衆쥬ᇰ〮生ᄉᆡᇰᄋᆞᆯ〮 便뼌安ᅙᅡᆫ케〮 ᄒᆞ〮시〮ᄂᆞᆫ 거시〮어늘〮 이〮제 도ᄅᆞᅘᅧ〮 ᄂᆞᄆᆡ〮 어ᅀᅵ〮아ᄃᆞ〮ᄅᆞᆯ〮 여희〮에〮 ᄒᆞ〮시〮ᄂᆞ니〮 셜〯ᄫᅳᆫ 잀〯 中듀ᇰ에〮도〮 離링別벼ᇙ ᄀᆞ〮ᄐᆞ니〮 업〯스니〮 【離링別벼ᇙ은〮 여흴〮 씨〮라〮】 일〮로〮 혜〯여〮 보〮건덴〮 므슴〮 慈ᄍᆞᆼ悲빙 겨〯시〮거뇨〮 ᄒᆞ고〮 目목〮連련이〮ᄃᆞ려〮 니ᄅᆞ샤〮ᄃᆡ〮 도라〮가〮 世솅〮尊존ᄭᅴ〮 내 ᄠᅳ〮들〮 펴〮아〮 ᄉᆞᆯ〯ᄫᆞ〮쇼셔〮
그 ᄢᅴ〮 目목〮連련이〮 種죠ᇰ〯種죠ᇰ〯 方바ᇰ便뼌〮으〮로〮 다시〮곰〮 ᄉᆞᆯᄫᅡ〮도〮 耶양輸슝ㅣ 잠〯ᄭᅡᆫ도〮 듣디〮 아니〮ᄒᆞ〮실ᄊᆡ〮 目목〮連련이〮 淨쪄ᇰ〮飯뻔〮王ᅌᅪᇰᄭᅴ〮 도라〮가〮 이〮 辭ᄊᆞᆼ緣ᄋᆑᆫ을〮 ᄉᆞᆯᄫᆞᆫ〮대〮 王ᅌᅪᇰ이〮 大땡〮愛ᅙᆡᆼ〮道또ᇢ〯ᄅᆞᆯ〮 블러〮 니ᄅᆞ샤〮ᄃᆡ〮 耶양輸슝는〮 겨〯지〮비라〮 法법〮을〮 모ᄅᆞᆯ〮ᄊᆡ〮 즐굽〮드리〮워〮 ᄃᆞᆺ〯온 ᄠᅳ〮들〮 몯〯 ᄡᅳ〮러〮ᄇᆞ리〮ᄂᆞ니〮 그듸〯 가〮아〮 아라〮듣게〮 니르라〮
大땡〮愛ᅙᆡᆼ〮道또ᇢ〯ㅣ 五ᅌᅩᆼ〯百ᄇᆡᆨ〮 靑쳐ᇰ衣ᅙᅴᆼ 더브〮르〮시고〮 耶양輸슝ᄭᅴ〮 가〮아〮 種죠ᇰ〯種죠ᇰ〯 方바ᇰ便뼌〮으〮로〮 두〯ᅀᅥ〯 번니르시〮니〮 耶양輸슝ㅣ ᄉᆞᆫᄌᆡ〮 듣디〮 아니〮ᄒᆞ〮시고〮 大땡〮愛ᅙᆡᆼ〮道또ᇢ〯ᄭᅴ〮 ᄉᆞᆯ〯ᄫᅩ〮샤ᄃᆡ〮 내〮 지븨〮 이시ᇙ 저긔〮 여듧〮 나랏〮 王ᅌᅪᇰ이〮 난겻기〮로〮 ᄃᆞ토〮거늘〮 우〮리〮 父뿡〯母무ᇢ〯ㅣ 듣디〮 아니〮ᄒᆞ〮샨 고〮ᄃᆞᆫ〮 釋셕〮迦강 太탱〮子ᄌᆞᆼ〯ㅣ ᄌᆡ죄〮 奇긩特뜩〮ᄒᆞ〮실ᄊᆡ〮 【奇긩ᄂᆞᆫ〮 神씬奇긩ᄒᆞᆯ 씨〮오〮 特뜩〮은〮 ᄂᆞᄆᆡ〮 므〮리예〮 ᄠᆞ〮로〮 다ᄅᆞᆯ 씨〮라〮】 우〮리〮 父뿡〯母무ᇢ〯ㅣ 太탱〮子ᄌᆞᆼ〯ᄭᅴ〮 드〮리〮ᅀᆞᄫᆞ〮시니〮 夫붕人ᅀᅵᆫ이〮 며느〮리〮 어〯드〮샤ᄆᆞᆫ〮 溫ᅙᅩᆫ和ᅘᅪᆼ히〮 사라〮 千쳔萬먼〮 뉘〯예〮 子ᄌᆞᆼ〯孫손이〮 니ᅀᅥ〮가〯ᄆᆞᆯ〮 위〯ᄒᆞ〮시니〮 太탱〮子ᄌᆞᆼ〯ㅣ ᄒᆞ마〮 나〮가〮시고〮 ᄯᅩ〮 羅랑睺ᅘᅮᇢ〮羅랑ᄅᆞᆯ〮 出츄ᇙ〮家강ᄒᆡ〯샤〮 나라〮 니ᅀᅳ〮리ᄅᆞᆯ〮 긋게〮 ᄒᆞ〮시〮ᄂᆞ니〮 엇〯더〮ᄒᆞ니〮ᅌᅵᆺ고〮
大땡〮愛ᅙᆡᆼ〮道또ᇢ〯ㅣ 드르시〮고〮 ᄒᆞᆫ 말〯도〮 몯〯ᄒᆞ〮야〮 잇더〮시니〮 그 ᄢᅴ〮 世솅〮尊존이〮 즉〮자히〮 化황〮人ᅀᅵᆫᄋᆞᆯ〮 보내〮샤〮 【化황〮人ᅀᅵᆫᄋᆞᆫ〮 世솅〮尊존ㅅ 神씬力륵〮으〮로〮 ᄃᆞ외의〮 ᄒᆞ〮샨 사〮ᄅᆞ〮미라〮】 虛헝空코ᇰ애〮셔〮 耶양輸슝ᄭᅴ〮 니ᄅᆞ샤〮ᄃᆡ〮 네〯 디〯나〮건 녜〯 뉫〯 時씽節져ᇙ에〮 盟며ᇰ誓쎼ᇰ〮 發버ᇙ〮願ᅌᅯᆫ〮혼〮 이〯ᄅᆞᆯ〮 혜〯ᄂᆞᆫ다〮 모ᄅᆞ〮ᄂᆞᆫ다〮 釋셕〮迦강如ᅀᅧᆼ來ᄅᆡᆼ 그 ᄢᅴ〮 菩뽕薩사ᇙ〮 ㅅ 道또ᇢ〯理링〯 ᄒᆞ〮노라〮 ᄒᆞ〮야〮 네손〯ᄃᆡ〮 五ᅌᅩᆼ〯百ᄇᆡᆨ〮銀ᅌᅳᆫ 도〯ᄂᆞ로〮 다ᄉᆞᆺ〮 줄깃〮 蓮련花황ᄅᆞᆯ〮 사〮아〮 錠뎌ᇰ〮光과ᇰ佛뿌ᇙ〮 ᄭᅴ〮 받ᄌᆞᄫᆞᆯ〮 쩌긔〮 네〯 發버ᇙ〮願ᅌᅯᆫ〮을〮 호〮ᄃᆡ〮 世솅〮世솅〮예〮 妻촁眷권〮이〮 ᄃᆞ외져〮 ᄒᆞ〮거늘〮 내〮 닐오〮ᄃᆡ〮 菩뽕薩사ᇙ〮이〮 ᄃᆞ외야〮 劫겁〮劫겁〮에〮 發버ᇙ〮願ᅌᅯᆫ〮 行ᅘᆡᇰᄒᆞ〮노라〮 ᄒᆞ〮야〮 一ᅙᅵᇙ〮切촁〮 布봉〮施싱 ᄅᆞᆯ〮 ᄂᆞᄆᆡ〮 ᄠᅳᆮ〮 거스〮디〮 아니〮ᄒᆞ〮거든〮 네〯 내 마〯ᄅᆞᆯ〮 다〯 드를따〮 ᄒᆞ〮야ᄂᆞᆯ〮 네〯 盟며ᇰ誓쏑〮ᄅᆞᆯ〮 호〮ᄃᆡ〮 世솅〮世솅〮예〮 난〯 ᄯᅡ〮마〯다〮 나라〮히며〮 자〮시며〮 子ᄌᆞᆼ〯息식〮이〮며〮 내 몸〮 니르〮리〮 布봉〮施싱ᄒᆞ〮야도〮 그딋 혼〮조초〮 ᄒᆞ〮야〮 뉘〮읏븐 ᄆᆞᅀᆞᄆᆞᆯ〮 아니〮호〮리라〮 ᄒᆞ〮더니〮 이〮제 엇〯뎨〮 羅랑睺ᅘᅮᇢ〮羅랑ᄅᆞᆯ〮 앗기〮ᄂᆞᆫ다〮
耶양輸슝ㅣ 이〮 말〯 드르시〮고〮 ᄆᆞᅀᆞ미〮 훤ᄒᆞ〮샤〮 前쪈生ᄉᆡᇰ앳〮 이〯리〮 어제〮 본〯 ᄃᆞᆺ〮 ᄒᆞ〮야〮 즐굽〮ᄃᆞᄫᆡᆫ ᄆᆞᅀᆞ미〮 다〯스〮러〮디〮거늘〮 目목〮連련이〮ᄅᆞᆯ〮 블러〮 懺참〮悔횡〮ᄒᆞ〮시고〮 【懺참〮ᄋᆞᆫ〮 ᄎᆞ〮ᄆᆞᆯ 씨〮니〮 내 罪쬥〯ᄅᆞᆯ〮 ᄎᆞ〮마〮 ᄇᆞ리〮쇼셔 ᄒᆞ〮논 ᄠᅳ〮디오〮 悔횡〮ᄂᆞᆫ〮 뉘〯으츨〮 씨〮니〮 아〯랫〮 이〯ᄅᆞᆯ〮 외오〮 호〮라〮 홀〮 씨〮라〮】 羅랑睺ᅘᅮᇢ〮羅랑ᄋᆡ〮 소〮ᄂᆞᆯ〮 자바〮 目목〮連련일〮 맛디〮시고〮 울〯며〮 여희〮시〮니라〮
淨쪄ᇰ〮飯뻔〮王ᅌᅪᇰ이〮 耶양輸슝¬의〮 ᄠᅳ〮들〮 누규〮리라〮 ᄒᆞ〮샤〮 즉〮자히〮 나랏〮 어비〮ᄆᆞᆮ내〮ᄅᆞᆯ〮 모도〮아〮 니ᄅᆞ샤〮ᄃᆡ〮 金금輪륜王ᅌᅪᇰ 아ᄃᆞ〮리〮 出츄ᇙ〮家강ᄒᆞ라〮 가〮ᄂᆞ니〮 그듸내〮 各각〮各각〮 ᄒᆞᆫ 아ᄃᆞᆯ〮옴〮 내〯야〮 내 孫손子ᄌᆞᆼ〯 조차〮가게〮 ᄒᆞ라〮 ᄒᆞ〮시니〮 즉〮자히〮 쉰〯 아ᄒᆡ〮 몯거늘〮 羅랑睺ᅘᅮᇢ〮羅랑 조차〮 부텨ᄭᅴ〮 가〮아〮 禮롕〯數숭〮 ᄒᆞ〮ᅀᆞ〮ᄫᆞᆫ대〮 부톄〯 阿ᅙᅡᆼ難난 일〮 시기〮샤〮 羅랑睺ᅘᅮᇢ〮羅랑ᄋᆡ〮 머리〮 갓기〮시니〮 녀느 쉰〯 아ᄒᆡ〮도〮 다〯 出츄ᇙ〮家강ᄒᆞ니〮라〮
부톄〯 命명〮ᄒᆞ〮샤〮 舍샹〮利링〮佛부ᇙ〮을〮 和ᅘᅪᆼ尙쌰ᇰ〮 이〮 ᄃᆞ외오〮 【和ᅘᅪᆼ尙쌰ᇰ〮ᄋᆞᆫ〮 갓가ᄫᅵ〮 이셔〮 외오〮다〮 ᄒᆞ〮논 마〯리니〮 弟똉〯子ᄌᆞᆼ〯ㅣ 샤ᇰ녜〮 갓가ᄫᅵ〮 이셔〮 經겨ᇰ ᄫᆡ호〮아〮 외올〮 씨〮니〮 和ᅘᅪᆼ尙쌰ᇰ〮ᄋᆞᆫ〮 스스ᅌᅳᆯ〮 니르니〮라〮】 目목〮連련이〮 闍썅梨롕 ᄃᆞ외야〮 【闍썅梨롕ᄂᆞᆫ〮 法법〮이〮라〮 혼〮 마〯리니〮 弟똉〯子ᄌᆞᆼ〯ᄋᆡ〮 ᄒᆡᇰ〯뎌〮글〮 正져ᇰ〮케〮 ᄒᆞᆯ 씨〮라〮】 열〮 가짓〮 戒갱〮ᄅᆞᆯ〮 ᄀᆞᄅᆞ치〮라〮 ᄒᆞ〮시니〮 【열〮 가짓〮 戒갱〮ᄂᆞᆫ〮 산〯 것 주기〮디〮 마롬〮과〮 도ᄌᆞᆨ 마롬〮과〮 婬음亂롼〮 마롬〮과〮 거〯즛말〯 마롬〮과〮 수을 고기〮 먹디〮 마롬〮과〮 모매〮 香햐ᇰ 기ᄅᆞᆷ〮 ᄇᆞᄅᆞ며〮 花황鬘만 瓔ᅙᅧᇰ珞락〮 빗이〮기〮 마롬〮과〮 놀애〮 춤〮 마롬〮과〮 노ᄑᆞᆫ〮 平뼈ᇰ床싸ᇰ애〮 안ᄯᅵ〮 마롬〮과〮 時씨ᇰ節져ᇙ〮 아닌〮 저긔〮 밥〮 먹디〮 마롬〮과〮 金금銀ᅌᅳᆫ보〯ᄇᆡ〮 잡디〮 마롬〮괘〮라〮】
羅랑雲ᅌᅮᆫ 이〮 져머〮 노ᄅᆞ〮ᄉᆞᆯ〮 즐〮겨〮 法법〮 드로〮ᄆᆞᆯ〮 슬〮히〮 너겨〮ᄒᆞ〮거든〮 부톄〯 ᄌᆞ로〮 니ᄅᆞ샤〮도〮 從쬬ᇰᄒᆞ〮ᅀᆞᆸ디〮 아니〮ᄒᆞ〮더니〮 後ᅘᅮᇢ〯에〮 부톄〯 羅랑雲ᅌᅮᆫ이〮ᄃᆞ려〮 니ᄅᆞ샤〮ᄃᆡ〮 부텨 맛나〯미〮 어려〮ᄫᅳ며〮 法법〮 드로〮미〮 어려〮ᄫᅳ니〮 네〯 이〮제 사〯ᄅᆞᄆᆡ〮 모〮ᄆᆞᆯ〮 得득〮ᄒᆞ고〮 부텨를〮 맛나〮 잇ᄂᆞ니〮 엇〯뎨〮 게을어〮 法법〮을〮 아니〮 듣ᄂᆞᆫ다〮 羅랑雲ᅌᅮᆫ이〮 ᄉᆞᆯᄫᅩ〮ᄃᆡ〮 부텻 法법〮이 精져ᇰ微밍ᄒᆞ〮야〮 져믄〮 아ᄒᆡ〮 어느〮 듣ᄌᆞᄫᅩ〮리〮ᅌᅵᆺ고〮 아〯래〮 ᄌᆞ조〮 듣ᄌᆞᄫᅡᆫ〮 마ᄅᆞᆫ〮 즉〮자히〮 도로 니저〮 ᄀᆞᆺᄇᆞᆯ ᄲᅮ〯니니〮 이〮제 져믄〮 저그〮란〮 안ᄌᆞᆨ〮 ᄆᆞᅀᆞᆷᄭᆞ자ᇰ〮 노〯다가〮 ᄌᆞ〮라면〮 어루〮 法법〮을〮 ᄇᆡ호〮ᅀᆞᄫᅩ〮리〮ᅌᅵ다〮 부톄〯 니ᄅᆞ샤〮ᄃᆡ〮 자ᄇᆞᆫ〮 이〯리〮 無뭉常쌰ᇰᄒᆞ〮야〮 모〮ᄆᆞᆯ〮 몯〯 미드ᇙ〮 거시〮니〮 네 목수〯믈〮 미더〮 ᄌᆞ〮라ᇙ〮 時씽節져ᇙ〮을〮 기드〮리〮ᄂᆞᆫ다〮 ᄒᆞ〮시고〮 다시〮 說ᄉᆑᇙ〮法법〮ᄒᆞ〮시니〮 羅랑雲ᅌᅮᆫ의〮 ᄆᆞᅀᆞ미〮 여러〮 아〯니라〮 【羅랑雲ᅌᅮᆫ이〮 出츄ᇙ〮家강호〮미〮 부텻 나〮히〮 셜흔〮세〯히러〮시니〮 穆목〮王ᅌᅪᇰ 닐굽〮찻 ᄒᆡ 丙벼ᇰ〯戌슈ᇙ〮이〮라〮】

偸투ᇢ羅랑國귁〮 婆빵羅랑門몬 迦강葉셥〮이〮 三삼十씹〮二ᅀᅵᆼ〮相샤ᇰ〮이〮 ᄀᆞᆺ고〮 글〮도〮 만〯히〮 알〯며〮 가ᅀᆞ〮며러〮 布봉〮施싱도〮 만〯히〮 ᄒᆞ〮더니〮 제 겨〯집도〮 됴〯ᄒᆞᆫ 相샤ᇰ이〮 ᄀᆞᆺ고〮 世솅〮間간앳〮 情쪄ᇰ欲욕〮이〮 업〯더라〮 迦강葉셥〮이〮 世솅〮間간 ᄇᆞ리〮고〮 뫼〯해〮 드〮러〮 닐오〮ᄃᆡ〮 諸졍佛뿌ᇙ〮도〮 出츄ᇙ〮家강ᄒᆞ〮샤ᅀᅡ〮 道또ᇢ〯理링〯ᄅᆞᆯ〮 닷ᄀᆞ시〮ᄂᆞ니〮 나도〮 그리〮 호〮리라〮 ᄒᆞ고〮 손〮ᅀᅩ 머리〮 갓고〮 묏고〯래〮 이셔〮 道또ᇢ〯理링〯 ᄉᆞ라ᇰᄒᆞ〮더니〮 虛헝空코ᇰ애〮셔〮 닐오〮ᄃᆡ〮 이〮제 부톄〯 나〮아〮 겨〯시〮니라〮 ᄒᆞ〮야〮ᄂᆞᆯ〮 즉〮자히〮 니러〮 竹듁〮園ᅌᅯᆫ으〮로〮 오〮더니〮 부톄〯 마조〮 나〮아〮 마ᄌᆞ샤〮 서르 고〯마〮ᄒᆞ〮야〮 드〮르샤〮 說ᄉᆑᇙ〮法법〮ᄒᆞ〮시니〮 곧 阿ᅙᅡᆼ羅랑漢한〮ᄋᆞᆯ〮 아〯니라〮 威ᅙᅱᆼ嚴ᅌᅥᆷ과〮 德득〮괘〮 커〮 天텬人ᅀᅵᆫ이〮 重뜌ᇰ〯히〮 너길〮ᄊᆡ〮 大땡〮迦강葉셥〮이〮라〮 ᄒᆞ〮더니〮 부텨 업〯스〮신 後ᅘᅮᇢ〯에〮 法법〮 디녀〮 後ᅘᅮᇢ〯世솅〮예〮 퍼〮디게〮 호〮미〮 이〮 大땡〮迦강葉셥〮의〮 히〮미라〮

따로 명시하지 않는 한에서 이 사이트의 모든 콘텐츠는 다음의 라이선스를 따릅니다: Creative Commons Attribution-ShareAlike 3.0 License