석보상절

釋譜詳節 六
釋셕〮譜봉〯詳쌰ᇰ節져ᇙ〮第똉〮六륙〮

世셰〮尊존이〮 象쌰ᇰ〯頭뚜ᇢ山산애〮 가〮샤〮 龍료ᇰ과〮 鬼귕〯神씬과〮 위〯ᄒᆞ〮야〮 說ᄉᆑᇙ〮法법〮ᄒᆞ〮더〮시다〮 龍룡鬼귕〯 위〯ᄒᆞ〮야〮 說ᄉᆑᇙ〮法법〮ᄒᆞ〮샤미〮 부텻 나〮히〮 셜흔〮 둘〯히러〮시니〮 穆목〮王ᅌᅪᇰ 여슷〮 찻 ᄒᆡ〮 乙ᅙᅵᇙ〮酉융〯1ᅟᅵ라〮

부톄〯 目목〮連련이〮 ᄃᆞ려〮 니ᄅᆞ샤〮ᄃᆡ〮 네〯 迦강毗삥羅랑國귁〮에〮 가〮아〮 아바〮 니ᇝ〯 긔〮와〮 아ᄌᆞ〮마 니ᇝ〯 긔〮와〮 아ᄌᆞ〮마 니〯ᄆᆞᆫ〮 大땡〮愛ᅙᆡᆼ〮道또ᇢ〯ᄅᆞᆯ〮 니르시〮니〮大땡〮愛ᅙᆡᆼ〮道또ᇢ〯ᅟᅵ 摩망耶양夫붕人ᅀᅵᆫᄉᅠ 兄ᄒᆑᇰ 니〯미〮시니〮 야ᇰᄌᆡ〮 摩망耶양夫붕人ᅀᅵᆫ만〮 몯〯 ᄒᆞ〮실ᄊᆡ〮 버근〮 夫붕人ᅀᅵᆫ이〮 ᄃᆞ외시〮니라〮
아자바〮 님〯 내〮ᄭᅴ〮 다〯 安ᅙᅡᆫ否부ᇢ〯ᄒᆞ〮ᅀᆞᆸ고〮 ᄯᅩ〮 耶양輸슝陁땅羅랑ᄅᆞᆯ〮 달애〮야〮 恩ᅙᆞᆫ愛ᅙᆡᆼ〮ᄅᆞᆯ〮 그쳐〮 羅랑睺ᅘᅮᇢ〮羅랑ᄅᆞᆯ〮 노하〮 보내〮야〮 샤ᇰ〯재〮 ᄃᆞ외에〮 ᄒᆞ라〮 羅랑睺ᅘᅮᇢ〮羅랑ᅟᅵ 得득〮道또ᇢ〯ᄒᆞ〮야〮 도라〮 가〮ᅀᅡ〮 어〮미ᄅᆞᆯ〮 濟졩〮渡똥〮ᄒᆞ〮야〮 涅녀ᇙ〮槃빤 得득〮 호〮ᄆᆞᆯ〮 나ᄀᆞᆮ〮게〮 ᄒᆞ리〮라〮 目목〮連련이〮 그 말〯 듣ᄌᆞᆸ〯고〮 즉〮자히〮 入ᅀᅵᆸ〮定뗘ᇰ〮ᄒᆞ〮야〮 펴〮엣〮던 ᄇᆞᆯᄒᆞᆯ〮 구필〮 ᄊᆞᅀᅵ〮예〮 ᄲᆞᆯ론〮 주〮를〮 니르니〮라〮
迦강毗삥羅랑國귁〮에〮 가〮아〮 淨쪄ᇰ〮飯뻔〮王ᅌᅪᇰᄭᅴ〮 安ᅙᅡᆫ否부ᇢ〯 ᄉᆞᆲ〯더니〮 耶양輸슝ᅟᅵ 부텻 使ᄉᆞᆼ〮者쟝〯 왯〮다〮 드르시〮고〮 使ᄉᆞᆼ〮者쟝〯ᄂᆞᆫ〮 브〮리〮신 사〯ᄅᆞ〮미라〮
靑쳐ᇰ衣ᅙᅴᆼᄅᆞᆯ〮 브〮려〮 긔별〮 아라〮 오라〮 ᄒᆞ〮시니〮 羅랑睺ᅘᅮᇢ〮羅랑 ᄃᆞ려〮다가〮 沙상彌밍 사모〮려〮 ᄒᆞ〮ᄂᆞ다〮 ᄒᆞᆯᄊᆡ〮 沙상彌밍ᄂᆞᆫ〮 새〮 出츄ᇙ〮家강ᄒᆞᆫ 사〯ᄅᆞ〮미니〮 世솅〮間간앳〮 ᄠᅳ〮들〮 그치〮고〮 慈ᄍᆞᆼ悲빙ᄉᅠ ᄒᆡᇰ〯뎌〮글〮 ᄒᆞ다〮 ᄒᆞ〮논 ᄠᅳ〮디니〮 처〮ᅀᅥᆷ 佛뿌ᇙ〮法법〮에〮 드〮러〮 世솅〮俗쑉〮앳〮 ᄠᅳ〮디〮 한〯 젼ᄎᆞ〮로〮 모로〮매〮 모〯딘〮 ᄠᅳ〮들〮 그치〮고〮 慈ᄍᆞᆼ悲빙ᄉᅠ ᄒᆡᇰ〯뎌〮글〮 ᄒᆞ〮야ᅀᅡ〮 ᄒᆞ릴〮ᄊᆡ〮 沙상彌밍라〮 ᄒᆞ니〮라〮
耶양輸슝ᅟᅵ 그 긔별〮 드르시〮고〮 羅랑睺ᅘᅮᇢ〮羅랑 더브〮러〮 노ᄑᆞᆫ〮 樓루ᇢ 우희〮 오ᄅᆞ시〮고〮 樓루ᇢ는〮 다라기〮라〮
門몬ᄃᆞᆯ〮ᄒᆞᆯ〮 다〯 구디〮 ᄌᆞᆷ겨〮 뒷〮더〮신니〮 目목〮連련이〮 耶양輸슝ᄉᅠ 宮구ᇰ의〮 가〮 보니〮 門몬ᄋᆞᆯ〮 다〯 ᄌᆞᄆᆞ고〮 유〯무 드〮류ᇙ〮 사〯ᄅᆞᆷ도〮 업〯거늘〮 즉〮자히〮 神씬通토ᇰ力륵〮으〮로〮 樓루ᇢ 우희〮 ᄂᆞ라〮 올아〮 耶양輸슝ᄉᅠ 알ᄑᆡ〮 가〮 셔니〮 耶양輸슝ᅟᅵ 보〮시고〮 ᄒᆞ녀ᄀᆞ〮론〮 분별〮ᄒᆞ〮시고〮 ᄒᆞ녀ᄀᆞ〮론〮 깃거〮 구쳐〮 니러〮 절〮ᄒᆞ〮시고〮 안ᄌᆞ쇼〮셔〮 ᄒᆞ〮시고〮 世셰〮尊존ᄉᅠ 安ᅙᅡᆫ否부ᇢ〯 묻〯ᄌᆞᆸ고〮 니ᄅᆞ샤〮ᄃᆡ〮 므스〮 므라〮 오〮시니〮ᅌᅵᆺ고〮 目목〮連련이〮 ᄉᆞᆯᄫᅩ〮ᄃᆡ〮 太탱〮子ᄌᆞᆼ〯 羅랑睺ᅘᅮᇢ〮羅랑ᅟᅵ 나〮히〮 ᄒᆞ마〮 아호〮빌ᄊᆡ〮 出츄ᇙ〮家강 ᄒᆡ〯여〮 聖셔ᇰ〮人ᅀᅵᆫᄉᅠ 道또ᇢ〯理링〯 ᄇᆡ화〮ᅀᅡ〮 ᄒᆞ리〮니〮 어버ᅀᅵ〮 子ᄌᆞᆼ〯息식〮 ᄉᆞ라ᇰ호〮ᄆᆞᆫ〮 아니〮한 ᄉᆞᅀᅵ〮어〮니와〮 ᄒᆞᄅᆞᆺ ᄋᆞᄎᆞ〮ᄆᆡ〮 命며ᇰ〮終쥬ᇰᄒᆞ〮야〮 命며ᇰ〮終쥬ᇰ은〮 목숨〯 ᄆᆞᄎᆞᆯ〮 씨〮라〮
모〯딘〮 길헤〮 ᄠᅥ러〮디면〮 恩ᅙᆞᆫ愛ᅙᆡᆼ〮ᄅᆞᆯ〮 머리〮 여희〮여〮 어〮즐코〮 아〮ᄃᆞᆨ〮 ᄒᆞ〮야〮 어〮미도〮 아ᄃᆞ〮ᄅᆞᆯ〮 모ᄅᆞ〮며〮 아ᄃᆞᆯ〮도〮 어〮미ᄅᆞᆯ〮 모ᄅᆞ〮리니〮 羅랑睺ᅘᅮᇢ〮羅랑ᅟᅵ 道또ᇢ〯理링〯ᄅᆞᆯ〮 得득〮ᄒᆞ〮야ᅀᅡ〮 도라〮 와〮 어〮마니〯ᄆᆞᆯ〮 濟졩〮渡똥〮 ᄒᆞ〮야〮 네〯 가짓〮 受쓔ᇢ〯苦콩〯ᄅᆞᆯ〮 여희〮여〮 涅녀ᇙ〮槃빤 得득〮 호〮ᄆᆞᆯ〮 부텨 ᄀᆞ〮ᄐᆞ〮시긔〮 ᄒᆞ리〮ᅌᅵ다〮 네〯 가짓〮 受쓔ᇢ〯苦콩〯ᄂᆞᆫ〮 生ᄉᆡᇰ과〮 老로ᇢ〯와〮 病뼈ᇰ〮과〮 死ᄉᆞᆼ〯왜〮라〮
耶양輸슝ᅟᅵ 니ᄅᆞ샤〮ᄃᆡ〮 如ᅀᅧᆼ來ᄅᆡᆼ 太탱〮子ᄌᆞᆼ〯ᄉᅠ 時씽節져ᇙ〮에〮 나〯ᄅᆞᆯ〮 겨〯집 사〯ᄆᆞ〮시니〮 내〮 太탱〮子ᄌᆞᆼ〯ᄅᆞᆯ〮 셤기〮ᅀᆞᄫᅩ〮ᄃᆡ〮 하ᄂᆞᆯ〮 셤기〮ᅀᆞᆸ〯ᄃᆞᆺ〮 ᄒᆞ〮야〮 ᄒᆞᆫ 번도〮 디만〮ᄒᆞᆫ 일〯 업〯수니〮 妻쳥眷권〮 ᄃᆞ외얀〮 디〮 三삼年년이〮 몯〯 차〮 이셔〮 世솅〮間간 ᄇᆞ리〮시고〮 城쎠ᇰ 나마〮 逃또ᇢ亡마ᇰᄒᆞ〮샤〮 車챵匿닉〮이〮 돌아〮 보내〮샤〮 盟며ᇰ誓쏑〮 ᄒᆞ〮샤ᄃᆡ〮 道또ᇢ〯理링〯 일워〮ᅀᅡ〮 도라〮 오〯리라〮 ᄒᆞ〮시고〮 鹿록〮皮삥 옷〮 니브샤〮 미친〮 사〯ᄅᆞᆷᄀᆞ〮티 묏 고〯래〮 수〮머〮 겨〯샤〮 여슷〮 ᄒᆡ〮ᄅᆞᆯ〮 苦콩〯行ᅘᆡᆼ〮ᄒᆞ〮샤〮 부텨 ᄃᆞ외야〮 나라〮해〮 도라〮 오〮샤도〮 ᄌᆞ올아ᄫᅵ〮 아니〮 ᄒᆞ〮샤〮 아〯랫〮 恩ᅙᆞᆫ惠ᅘᆒᆼ〮ᄅᆞᆯ〮 니저〮 ᄇᆞ리〮샤〮 길〮 녀ᇙ 사〯ᄅᆞᆷ과〮 ᄀᆞ〮티 너기〮시니〮 나〮ᄂᆞᆫ〮 어버ᅀᅵ〮 여희〮오〮 ᄂᆞᄆᆡ〮 그ᅌᅦ 브터〮 사로〮ᄃᆡ〮 우〮리〮 어ᅀᅵ〮 아ᄃᆞ〮리〮 외〮ᄅᆞᆸ고〮 입〯게〮 ᄃᆞ외야〮 人ᅀᅵᆫ生ᄉᆡᇰ 즐〮거〮ᄫᅳᆫ ᄠᅳ〮디〮 업〯고〮 주구〮믈〮 기드〮리〮노니〮 목수〯미〮 므〮거〮ᄫᅳᆫ 거실〮ᄊᆡ〮 손〮ᅀᅩ 죽디〮 몯〯 ᄒᆞ〮야〮 셟〯고〮 애〯 왇븐 ᄠᅳ〮들〮 머거〮 갓가ᄉᆞ〮로〮 사〯니〮노리〮 비록〮 사〯ᄅᆞᄆᆡ〮 무〮레〮 사〯니〮고도〮 쥬ᇰᄉᆡᇰ마〮도〮 몯〯 호〮ᅌᅵ다〮 셜〯ᄫᅳᆫ 人ᅀᅵᆫ生ᄉᆡᇰ이〮 어딋〮던 이〮 ᄀᆞ〮ᄐᆞ니〮 이시리〮ᅌᅵᆺ고〮 이〮제 ᄯᅩ〮 내 아ᄃᆞ〮ᄅᆞᆯ〮 ᄃᆞ려〮 가〯려〮 ᄒᆞ〮시〮ᄂᆞ니〮 眷권〮屬쑉〮 ᄃᆞ외ᅀᆞᄫᅡ〮셔〮 셜〯ᄫᅳᆫ 일〯도〮 이〮러〮ᄒᆞᆯ쎠〮 眷권〮屬쑉〮ᄋᆞᆫ〮 가시〮며〮 子ᄌᆞᆼ〯息씩〮이〮며〮 죠ᇰ〯이〮며〮 집아ᇇ〮 사〯ᄅᆞᄆᆞᆯ〮 다〯 眷권〮屬쑉〮이〮라〮 ᄒᆞ〮ᄂᆞ〮니라〮

따로 명시하지 않는 한에서 이 사이트의 모든 콘텐츠는 다음의 라이선스를 따릅니다: Creative Commons Attribution-ShareAlike 3.0 License